Футбол тарихидаги энг машҳур тўплардан бири яна аукционга қўйилди. 1986 йилги Жаҳон чемпионати чорак финалида Аргентина ва Англия терма жамоалари ўртасидаги баҳсда ишлатилган Adidas Azteca тўпи савдога чиқарилди. Бу ҳақда “My Seldon” нашри хабар берди.
Айнан шу тўп билан Диего Марадона футбол тарихидаги энг машҳур икки голини урган. Улардан бири “қўл билан урилган гол”, иккинчиси эса кейинчалик “Аср голи” деб тан олинган.
Қарийб 40 йил ўтганига қарамай, тўп ўзининг тарихий аҳамияти сабаб қимматини йўқотмаган. Аукцион савдолари 31 июль куни 2,5 млн доллардан бошланади. Ташкилотчилар унинг 10 млн доллар ёки ундан ҳам қимматроққа сотилишини кутмоқда.
Мазкур тўп 2022 йилда 2,37 млн долларга сотилган эди. Агар бу сафар ҳам юқори нархда харид қилинса, у Марадонанинг ўша ўйинда кийган футболкасидан ҳам қимматроқ сотилган футбол ёдгорлигига айланиши мумкин.
Футбол мухлислари учун бу тўп нафақат спорт анжоми, балки жаҳон футболи тарихидаги энг буюк лаҳзалардан бири билан боғлиқ ноёб коллекция буюми ҳисобланади.
