“Савдони ривожлантириш компанияси” АЖда 2026 йилнинг биринчи ярмида маҳаллий тадбиркорлик ва экспорт фаолиятини қўллаб-қувватлаш борасида амалга оширилган ишлар юзасидан матбуот анжумани ўтказилди.
Унда экспортчилар учун яратилаётган имкониятлар, молиявий кўмак ва янги бозорларга чиқиш бўйича эришилган натижалар ҳақида маълумот берилди.
Қайд этилишича, 2026 йилнинг дастлабки олти ойида тадбиркорлик субъектларини қўллаб-қувватлаш мақсадида жами 309,3 миллиард сўм маблағ йўналтирилган. Шундан 140,1 миллиард сўми 1 139 нафар тадбиркорга бевосита молиявий кўмак сифатида ажратилган.
Ҳисобот даврида тадбиркорлик субъектлари томонидан 1,7 миллиард долларлик экспорт амалга оширилган.
25 та корхона илк бор экспортга чиқди
Жорий йилнинг биринчи ярмида 25 та маҳаллий корхона илк бор экспорт фаолиятини бошлаган. Ушбу корхоналар томонидан хорижий бозорларга 15,3 миллион долларлик маҳсулот экспорт қилинган.
Шунингдек, 10 та йирик экспортчи корхонанинг экспорт ҳажми 133,7 миллион долларга етган. Бу кўрсаткич аввалги даврга нисбатан қарийб 2,2 баробар кўп.
“Made in Uzbekistan” маҳсулотларини тарғиб қилишга эътибор кучайтирилмоқда
Матбуот анжуманида маҳаллий маҳсулотларни халқаро бозорларда тарғиб қилиш бўйича амалга оширилаётган ишлар ҳам муҳокама қилинди.
Маълум қилинишича, “Made in Uzbekistan” кўргазмаларида иштирок этаётган тадбиркорлар сони 142 фоизга ошган, бу йўналишга ажратилган маблағ миқдори эса тўрт баробарга кўпайган.
Маҳсулотларни халқаро реклама ва савдо майдонларида тарғиб қилиш йўналишида ҳам ўсиш кузатилган. Бу йўналишда иштирок этаётган тадбиркорлар сони икки баробарга, ажратилган маблағ миқдори эса 70 фоизга ошган.
Компания вакилларига кўра, халқаро кўргазмалар ва бизнес-миссиялар маҳаллий ишлаб чиқарувчилар учун хорижий ҳамкорлар билан тўғридан-тўғри музокаралар олиб бориш, маҳсулотларини намойиш этиш ҳамда янги экспорт шартномаларини тузиш имконини бермоқда.
Қайси бозорларга чиқиш режалаштирилмоқда?
Компания томонидан экспорт географиясини янада кенгайтириш бўйича ишлар давом эттирилмоқда.
Хусусан, анъанавий бозорлардан ташқари Европа Иттифоқи, Яқин Шарқ ва Жануби-Шарқий Осиё мамлакатлари бозорларига маҳаллий маҳсулотлар экспортини йўналтириш бўйича янги механизмлар ишлаб чиқилмоқда.
Шунингдек, тадбиркорлар учун экспорт фаолияти, божхона имтиёзлари ва ташқи савдо қонунчилигига оид масалалар бўйича ўқув-амалий курслар ташкил этилмоқда.
Компаниянинг йилнинг иккинчи ярмидаги устувор вазифалари қаторида экспортчилар учун рақамли тизимларни ривожлантириш, мавжуд қўллаб-қувватлаш механизмларини такомиллаштириш ва экспорт географиясини кенгайтириш белгиланган.
Шу билан бирга, маҳаллий тадбиркорларнинг халқаро кўргазмалардаги иштирокини кенгайтириш, хорижий ҳамкорлар билан алоқаларни мустаҳкамлаш ва янги экспорт шартномаларини тузиш бўйича ишларни давом эттириш режалаштирилган.
Матбуот анжуманида компания раҳбарияти ва соҳа мутахассислари журналистларнинг саволларига жавоб берди. Тадбир якунида жамоатчилик олдида очиқликни янада кучайтириш мақсадида ахборот ҳамкорлигини йўлга қўйишга қаратилган меморандумлар таклиф этилди.
