Бугун, 7 октябрь куни Тошкент метрополитенининг “Шаҳристон” бекатида эски метро поездида техник носозлик юз берди. Бу ҳақда “Тошкент метрополитени” АЖ хабар берди.
Қайд этилишича, соат 08:22 да 1985 йилда ишлаб чиқарилган 69-сонли ҳаракат таркибида техник носозлик аниқланган. Шу сабабли поезд 6 дақиқага тўхтаб қолган.
Шундан сўнг йўловчилар поезддан туширилиб, ҳаракат таркиби техник кўрикдан ўтказиш учун махсус йўлакка олиб кетилган.
Йўловчиларга хизмат кўрсатишда узилишларга йўл қўймаслик мақсадида захира поезд зудлик билан йўналишга чиқарилган.
Маълум қилинишича, айни вақтда носозликни бартараф этиш бўйича тегишли техник чоралар кўрилган.
“Юзага келган ноқулайлик учун йўловчилардан узр сўраймиз”, дейилади муносабатда.
