Жаҳон футболи бошқарув органи — FIFA айрим аъзо уюшмаларининг кескин қаршилигидан сўнг бизнес лойиҳасининг бир қисмини ташқи инвесторларга сотиш режасини амалга оширмаслигини маълум қилди. Бу ҳақда BBC нашри хабар берди.
FIFA режасига кўра, Жаҳон чемпионати ва бошқа йирик мусобақалар билан боғлиқ янги бўлимнинг қарийб 20 фоиз улушини сотиш орқали 4,2 миллиард долларгача маблағ жалб қилиш кўзда тутилган эди. Лойиҳада ушбу бўлим 20 миллиард долларга баҳоланган.
Мазкур ташаббус эълон қилинганидан сўнг Европа футболи бошқарув органи — UEFA томонидан қаттиқ танқид қилинди. UEFA бу каби муҳим қарорнинг махфий тарзда ишлаб чиқилганини масъулиятсизлик деб баҳолади ва FIFAни футбол қадриятларини тижоратга айлантиришда айблади.
Айрим хабарларга кўра, UEFA аъзолари лойиҳа амалга оширилган тақдирда FIFA мусобақаларини бойкот қилиш масаласини ҳам кўриб чиққан.
FIFA президенти Жанни Инфантино барча томонларнинг фикри инобатга олинганини ва ташаббус кутилган бирлаштирувчи мақсад ўрнига ихтилофларга сабаб бўлгани учун уни давом эттирмасликка қарор қилинганини билдирди.
"Бизнинг мақсадимиз доимо бирлашиш ва ривожланиш бўлган. Шу сабабли мазкур таклиф амалга ошмайди", — деди Инфантино.
Шунингдек, унинг катта маслаҳатчиси Карлос Кордейро истеъфога чиқиб, лойиҳани "футбол учун ёмон келишув" деб атади. FIFA операцион директори Кевин Ламур эса ходимлар ташаббус ҳақида етарлича хабардор қилинмаганини билдириб, уни "бир кишининг лойиҳаси" сифатида баҳолади.
FIFA президенти Жанни Инфантино яқин вақтларга қадар жаҳон футболидаги энг кучли раҳбарлардан бири сифатида кўрилган эди. Ҳатто АҚШ президенти Дональд Трамп уни "футбол қироли" деб атаган.
Бироқ сўнгги воқеалар Инфантино учун жиддий синовга айланди. FIFAнинг Жаҳон чемпионати ва бошқа мусобақалардан келадиган келгуси даромадларни ташқи инвесторларга таклиф қилиш режаси катта қаршиликларга сабаб бўлди.
Бу воқеалар Инфантинонинг келаси йилги эҳтимолий қайта сайланиши олдидан унинг мавқеига жиддий таъсир қилиши мумкин.
