Америкалик миллиардер, тадбиркор Илон Маск ўзи асос солган Neuralink компанияси раҳбарларидан бири ва тўрт нафар фарзандининг онаси Шивон Зилис билан муносабатларини тугатди. Бу ҳақда Зилис 2 октябрь куни ўзининг X ижтимоий тармоғидаги саҳифасида маълум қилди.
Зилис муносабатларининг кутилмаганда якунланганини айтган. Унинг таъкидлашича, бир ҳафта ичида “севишдан қўйиб юборишга” ўтиш оғир кечган.
“Фарзандларимиз учун ниҳоятда миннатдорман. Улар ҳаётимдаги ҳар бир кунни энг яхши кунга айлантиради. Мен буёғига у билан яхши дўст ҳамда фарзандларимизни биргаликда тарбиялайдиган яхши ота-она бўлиб қолишимизга чин дилдан умид қиламан ва бунинг учун ибодат қиламан”, деб ёзди Зилис.
У, шунингдек, Маскка нисбатан ҳали ҳам меҳр ва ғамхўрлик ҳис қилишини билдирган.
“Бу ишлар менга оғир ботмоқда, бироқ Илон ҳақида доим қайғураман ва ҳар доим унинг бахтли бўлишини истайман. Омад тилайман, Илон. Дунёда сенинг борлигинг омад”, деган Зилис.
Зилис ўз постига Маск билан сўнгги ёзишмаларидан скриншотни ҳам илова қилган. Унда 24 сентябрь куни Маск “Мен ҳам сени севаман” мазмунида жавоб ёзгани кўринади. Зилис, шунингдек, Маскнинг Оқ уйда ўтказилган Хитой раҳбари Си Цзиньпин шарафига кечки овқатга уни ҳам таклиф қилиши мумкинлигини билмаганидан афсусланганини ёзганини маълум қилган.
Орадан бир неча кун ўтиб, жуфтлик муносабатларини тугатган. Маск ҳозирча бу ҳақда расмий изоҳ бермаган. Шу билан бирга, Зилиснинг таъкидлашича, миллиардер уни X ижтимоий тармоғида кузатишни ҳам тўхтатган.
Маълумот учун, Шивон Зилис Neuralink компаниясида операциялар ва махсус лойиҳалар бўйича раҳбар сифатида фаолият юритади. У ва Илон Маскнинг тўрт нафар фарзанди бор: 2021 йилда эгизаклар Страйдер ва Азур, 2024 йилда Аркадия ҳамда 2025 йилда Селдон Ликургус туғилган.
Илон Маскнинг оммага маълум фарзандлари сони 14 нафарни ташкил этади. Унинг Жастин Уилсон билан никоҳидан олти фарзанди бўлган. Уларнинг тўнғичи Невада Александр 2002 йилда 10 ҳафталигида вафот этган. Кейинчалик эгизаклар Гриффин ва Вивиан ҳамда уч эгизак Кай, Саксон ва Дамиан туғилган.
Маск британиялик актриса Талула Райли билан икки марта никоҳдан ўтган, бироқ уларнинг фарзандлари бўлмаган.
Кейинчалик у канадалик хонанда Граймс билан муносабатидан уч нафар фарзанд кўрган. Шунингдек, Маскнинг Эшли Сент-Клэрдан ҳам бир фарзанди борлиги маълум қилинган. Шу тариқа, унинг оммага маълум фарзандлари сони 14 нафарга етган.
