Словения президенти Наташа Пирц-Мусар Хорватиядаги таътилдан қайтиши чоғида автоҳалокатга учради.
Словения радио ва телевидениеси маълум қилишича, ҳодиса 31 июль куни Кастелец туннелида содир бўлган. Президент енгил жароҳат олган ва бир кеча Изола шаҳридаги шифохонада назорат остида бўлган. Ҳозирда у уйига қайтган ва аҳволи яхши экани айтилмоқда.
Копер полицияси маълумотига кўра, аварияда президентни кузатиб бораётган кортеж таркибидаги икки хизмат автомобили тўқнашган. Ҳодиса оқибатида икки киши жароҳат олган, улардан бири оғир ҳолатда шифохонага етказилган.
Ҳодиса сабаблари бўйича текширув ишлари давом этмоқда. Кастелец туннели қутқарув ишлари сабаб вақтинча ёпилган, кейинчалик ҳаракат қайта тикланган.
Наташа Пирц-Мусар 2022 йилда сайланган ва Словения тарихидаги илк аёл президент ҳисобланади.
