Грецияда ўрмон ёнғинларини ўчириш ишларида иштирок этаётган икки вертолёт ҳавода тўқнашиб кетиши оқибатида икки экипаж аъзоси ҳалок бўлди. Яна икки киши, жумладан, британиялик учувчи тирик қолган. Бу ҳақда "BBC" хабар берди.
Нашр маълум қилишича, ҳодиса Афинадан тахминан 65 километр ғарбда, Аттика ва Беотия ҳудудлари чегарасидаги йирик ёнғинни бартараф этиш вақтида содир бўлган. Австралиянинг "McDermott Aviation" компанияси ижарага берган икки "Bell" русумли вертолёт ҳавода тўқнашган.
Воқеа акс этган видеода вертолётлардан бири иккинчисининг паррагига урилгани, шундан сўнг ҳаво кемаси ёниб кетиб, жарликка қулаб тушганини кўриш мумкин. Иккинчи вертолёт эса фавқулодда қўнишга муваффақ бўлган.
Ҳалок бўлганлар Дания фуқароси бўлган учувчи ҳамда Греция ёнғин хизмати координатори экани айтилмоқда. Иккинчи вертолётда бўлган британиялик учувчи ва грек координатори енгил жароҳатлар билан қутқарилган. Улар шифохонага ётқизилган бўлиб, эҳтиёт чораси сифатида 24 соат давомида шифокорлар назоратида қолади.
Манбаларга кўра, ҳодисадан сўнг мамлакат бўйлаб "Bell" русумли барча ёнғин ўчирувчи вертолётлар парвозлари вақтинча тўхтатилган.
Греция Бош вазири Кириакос Мицотакис ҳалок бўлганларнинг яқинларига ҳамдардлик билдириб, ушбу фожиа бутун мамлакатни қайғуга солганини таъкидлаган.
"McDermott Aviation" компанияси асосчиси Жон Макдермотт ҳам баёнот бериб, компания тергов билан шуғулланаётган мутасадди идоралар билан ҳамкорлик қилишини маълум қилган.
Айни пайтда Грециянинг турли ҳудудларида йирик ўрмон ёнғинлари давом этмоқда. Ёнғинлар сабаб юзлаб аҳоли эвакуация қилинган бўлиб, уларни ўчириш ишларига юзлаб ўт ўчирувчилар ва махсус авиация жалб этилган.
