Бугун, 11 август куни Тошкентда футбол бўйича Осиё Чемпионлар лигаси Элит мусобақаси саралаш босқичидан ўрин олган “Пахтакор” ва Иорданиянинг “Ал Ҳусайн” жамоалари ўртасидаги учрашув бўлиб ўтди. Унда Тошкент клуби 3:0 ҳисобида ғалаба қозониб, мусобақанинг лига босқичига йўл олди.
Учрашув “Пахтакор”нинг тўлиқ устунлиги остида ўтди. Тошкентликлар 8-дақиқада Достонбек Ҳамдамовнинг голи эвазига ҳисобни очди. 30-дақиқада эса Ҳамдамов яна бир бор рақиб дарвозасини ишғол қилиб, дубл қайд этди.
Иккинчи бўлимнинг 52-дақиқасида Ироқ терма жамоаси ҳужумчиси Башар Ресан “Пахтакор”нинг учинчи голини урди. Қолган дақиқаларда ҳисоб ўзгармади.
Шу тариқа “Пахтакор” “Ал Ҳусайн”ни 3:0 ҳисобида мағлуб этиб, Осиёнинг энг нуфузли клублар мусобақасидаги 20-иштирокини таъминлади.
Маълумот учун, 2026/2027 йилги мавсумда Осиё Чемпионлар лигаси Элит мусобақасининг лига босқичи учун қуръа ташлаш маросими 18 август куни Куала-Лумпурда ўтказилади. Лига босқичидаги дастлабки учрашувлар сентябрь ойида бошланади.
