Польшада уч нафар қўшни 5-қават балконидан қулаб тушган 4 ёшли қизалоқни ёпинчиқ ёрдамида тутиб қолиб, унинг ҳаётини сақлаб қолди. Воқеа Ломжа шаҳрида содир бўлган.
Ҳодиса 9 август куни тушдан кейин юз берган. Қўшнилар кўп қаватли уйнинг 5-қаватидаги балкон четида осилиб турган қизалоқни кўриб қолган.
Қутқарув хизматлари етиб келишини кутмай, уч нафар эркак зудлик билан ёрдамга ошиққан. Улар қизалоқ қулаб тушиши мумкин бўлган жойга ёпинчиқни ёйиб, уни пастга тушган вақтида тутиб қолган.
Воқеа кузатув камераларига ҳам муҳрланган. Маҳаллий полиция вакили Каролина Войтсекяннинг айтишича, қўшниларнинг тезкор ҳаракати туфайли фожианинг олди олинган.
Қизалоқни қутқаришда иштирок этган қўшнилардан бири Дариуш Плонскийнинг таъкидлашича, воқеа бир неча сония ичида содир бўлган.
"Бу бир неча сония масаласи эди. Боланинг бошқа томонга ўтганини кўрганимизда, ёпинчиқни ёйиб, уни тутиб қолишга зўрға улгурдик", деган у.
Қизалоқ шифохонага олиб борилган. Шифокорлар унинг танасида енгил кўкаришлар борлигини аниқлаган. Ҳозирда унинг аҳволи барқарор.
Полиция маълумотларига кўра, воқеа вақтида қизалоқнинг онаси ухлаётган бўлган, отаси эса ишлаш учун чет элга кетган. Кейинчалик аёлнинг қонида 0,7 промилле миқдорида алкогол аниқланган.
Айни пайтда ҳолат юзасидан тергов ҳаракатлари олиб борилмоқда. Агар она болани ўлим ёки оғир жароҳат олиш хавфи остида қолдирганликда айбдор деб топилса, унга беш йилгача озодликдан маҳрум қилиш жазоси тайинланиши мумкин.
