2002 йилги Жаҳон чемпионати ғолиби ва "Олтин тўп" соҳиби Роналдиньо Франциянинг "Монако" баскетбол клубига сармоя киритиши ва жамоани сотиб олиши мумкин. Бу ҳақда "L'Equipe" хабар берди.
Манбага кўра, "Монако" ҳозирда жиддий молиявий қийинчиликларга дуч келмоқда. Шу муносабат билан Роналдиньо 10 август куни клуб бош менежери Алексей Ефимовга мактуб йўллаб, Андорранинг Clayton Sports инвестиция фонди кўмагида жамоага сармоя киритиш нияти борлигини билдирган.
Қайд этилишича, Роналдиньонинг режаси амалга ошса, у "Монако" баскетбол клубининг янги инвесторларидан бирига айланиши мумкин.
"Монако" уч карра Франция чемпиони бўлган. Жамоа, шунингдек, мамлакат чемпионатининг амалдаги ғолиби ҳисобланади. Клуб икки марта Франция Кубогини ва бир марта Европа Кубогини қўлга киритган.
Маълумот учун, Роналдиньо 2003–2008 йилларда "Барселона" сафида тўп тепган. У каталонияликлар билан икки марта Испания чемпионлигини қўлга киритган ва Чемпионлар лигасида ғолиб бўлган.
Бразилиялик футболчи фаолияти давомида "Пари Сен-Жермен", "Милан", шунингдек, "Фламенго", "Атлетико Минейро", "Гремио" ва "Флуминенсе" клубларида ҳам ўйнаган.
Роналдиньо Бразилия терма жамоаси билан 1999 йилда Америка Кубогида ғолиб чиққан. 2002 йилда эса жамоаси билан Жаҳон чемпионлигини қўлга киритган.
