Исроил Бош вазири Бенямин Нетаньяху идораси Туркиянинг Нетаняхуга нисбатан Интерпол орқали "қизил огоҳлантириш" эълон қилиш ҳақидаги сўровига муносабат билдирди. Исроил томони Туркия президенти Ражаб Тоййиб Эрдўғанни "антисемит диктатор" деб атади. Бу ҳақда хорижий манбаларга таяниб Zamon.uz хабар берди.
Баёнотда Эрдўғаннинг Исроил раҳбарияти ва ҳарбийларига босим ўтказишга қаратилган уринишлари натижа бермаслиги таъкидланган. Шунингдек, Исроил Туркиянинг Суриядаги фаолияти ва минтақадаги сиёсатини танқид қилган.
Аввалроқ Туркия Адлия вазири Акин Гюрлек Нетаньяху ва яна бир исроилликка нисбатан Интерполнинг "қизил огоҳлантириш"ини сўраш жараёни бошланганини маълум қилган. Бу қарор Ғазога йўл олган Global Sumud Flotilla кемаларига қарши май ойида амалга оширилган операция билан боғлиқ иш доирасида қабул қилинган.
Туркия суди Нетаньяху ва бошқа гумонланувчиларга нисбатан геноцид ва инсониятга қарши жиноятлар каби айбловлар бўйича иш юритмоқда. Интерпол эса Туркиянинг сўровини кўриб чиқиб, "қизил огоҳлантириш" бериш ёки бермаслик бўйича қарор қабул қилиши керак.
Бу воқеалар Исроил ва Туркия ўртасида сўнгги пайтларда кучайиб бораётган дипломатик кескинлик фонида юз бермоқда. Хусусан, икки давлатнинг Суриядаги сиёсат ва хавфсизлик масалалари бўйича қарашлари ҳам жиддий фарқ қилмоқда.
