АҚШ Президенти Дональд Трамп маъмурияти Халқаро жиноий судга (ХЖС) қарши санкциялар жорий қилди. Вашингтон бундай қарорни суднинг америкаликларни таъқиб қилишига йўл қўймаслик билан изоҳлаган. Бу ҳақда “Reuters” хабар берди.
АҚШ Давлат котиби Марко Рубио мазкур қарор юзасидан баёнот берган.
“Президент Трамп Халқаро жиноий судга америкаликларни таъқиб қилишга ҳеч қачон йўл қўймайди. Шу сабабли бугун АҚШ унга қарши санкциялар жорий этмоқда. Биз ушбу ноқонуний судни ресурслардан маҳрум қилиш ва унинг фаолият юритиш имкониятларини фалажлаш орқали у билан боғлиқ операцияларни тақиқлаймиз”, деган у.
Қайд этилишича, қарор Халқаро жиноий суднинг собиқ судьяси Наванетхем Пиллэй Нобель тинчлик мукофотига сазовор бўлганидан бир неча соат ўтиб қабул қилинган. Жанубий африкалик судья ва ҳуқуқшунос ушбу мукофот билан тинчлик ва халқаро ҳуқуқни ҳимоя қилиш йўлидаги хизматлари учун тақдирланган.
Нобель қўмитаси унинг фаолияти апартеидга қарши кураш даврида Нельсон Мандела ва бошқа фаолларни ҳимоя қилишдан тортиб, халқаро миқёсдаги муҳим суд жараёнларида иштирок этишгача бўлган даврни қамраб олганини таъкидлаган.
Халқаро жиноий суд прокурори ўринбосари Нажат Шамим Хон эса Вашингтоннинг қарорини танқид қилган. Унинг таъкидлашича, санкциялар суд фаолиятини тўхтата олмайди.
“Ушбу санкциялар халқаро миқёсда ҳуқуқ устуворлигига ва мустақил суд органи томонидан олиб борилаётган ишларга путур етказишга қаратилган. Барча ишларимиз, терговларимиз ва суд таъқиблари давом этаверади”, деган у.
Маълумот учун, АҚШ Халқаро жиноий суд фаолиятини тартибга солувчи Рим статутини ратификация қилмаган ва суд аъзоси ҳисобланмайди. Вашингтон, айниқса, суднинг Исроил Бош вазири Биньямин Нетаньяху ва бошқа исроиллик расмийларга нисбатан ҳибсга олиш ордерларини чиқариши, шунингдек, Афғонистонда америкалик ҳарбийларга нисбатан олиб борилган тергов юзасидан бир неча бор норозилик билдирган.
