Панаманинг жанубида 9 октябрь куни 7,7 магнитудали кучли зилзила содир бўлди. Оқибатда бинолар шикастланиб, айримлари қулаб тушган. Минглаб одамлар хавфсизлик мақсадида кўчаларга чиққан. Ҳозирча қурбонлар ва жароҳатланганлар ҳақида маълумот берилмаган. Бу ҳақда “Reuters” хабар берди.
АҚШ Геология хизмати маълумотига кўра, зилзила 12,6 километр чуқурликда қайд этилган. Унинг эпицентри аҳоли сийрак яшайдиган ҳудудда, мамлакат пойтахти Панама шаҳридан қарийб 200 километр узоқликда жойлашган. Асосий силкинишдан кейин 40 дан ортиқ такрорий зилзилалар кузатилган.
Кучли силкинишлар сабаб Панама шаҳридаги офис биноларидан ходимлар эвакуация қилинган. Кўчаларга минглаб одамлар чиққани боис транспорт ҳаракатида қийинчиликлар юзага келган. Токумен халқаро аэропортида парвозлар вақтинча тўхтатилган, кейинчалик эса қайта тикланган. Панама канали ва “Кобре Панама” мис кони фаолиятида узилишлар кузатилмаган.
Панама Президенти Раул Мулино зилзиладан зарар кўрган Пенономе шаҳрига борган. У ерда айрим бинолар қулаб тушган, черковлардан бири эса шикастланган. Зилзила оқибатлари мамлакат жанубидаги Читре шаҳри ва Лос-Сантос вилояти соҳилларида ҳам қайд этилган.
Панама Геология институти директори Нестор Луке зилзила Асуэро-Сона ёриқлар тизимида тўпланган кучланишнинг бўшаши натижасида юз берганини билдирган. Унинг айтишича, силкинишлар мамлакатнинг барча ҳудудларида сезилган.
Панама шаҳрида зилзила қарийб 40 сония давом этган. Силкинишлар вақтида эски бинолардан бирининг олтинчи қаватида бўлган Сабина Риос бу сўнгги йилларда ҳис қилган энг кучли ва узоқ давом этган зилзилалардан бири бўлганини айтган.
48 ёшли техник ходим Виктор Пинсон эса зилзила вақтида баланд биноларнинг ташқи томонида ишлаётган ойна тозаловчилар кучли тебранишлар таъсирида чайқалиб кетганини кўрганини билдирган.
АҚШ Геология хизмати зилзила оқибатидаги иқтисодий зарар Панама ялпи ички маҳсулотининг 1–10 фоизигача етиши мумкинлигини баҳолаган. Мамлакатда электр энергияси таъминоти билан шуғулланувчи “Naturgy” компанияси эса олти вилоятда электр таъминотида узилишлар кузатилганини маълум қилган.
Қайд этиш жоизки, Панамада кучли зилзилалар кам учрайди. Мамлакатда 12 октябрь куни фавқулодда вазиятларда аҳолини эвакуация қилиш бўйича умуммиллий машғулот ўтказиш режалаштирилган.
