Туркиянинг Ялова шаҳрида 2025 йил 26 сентябрь куни олтинчи қаватдаги хонадон деразасидан тушиб кетиб, ҳалок бўлган қўшиқчи Гуллунун ўлими билан боғлиқ суд жараёни якунланди. Онасига нисбатан олдиндан режалаштирилган қасддан одам ўлдириш жиноятини содир этганликда айбланган 28 ёшли Туғян Улкем Гултер оғирлаштирилган умрбод қамоқ жазосига ҳукм қилинди. Бу ҳақда “Haberler” хабар берди.
Ҳодисадан кейин бошланган кенг қамровли тергов доирасида марҳуманинг қизи Туғян Улкем Гултер қўлга олиниб, ҳибсга олинган. Кейинчалик иш судга оширилган.
Ҳукм эълон қилинган суд мажлисида прокурор тўпланган далиллар ва иш материалларига асосланиб, судланувчига онасини олдиндан режалаштириб, қасддан ўлдирганлик айби билан оғирлаштирилган умрбод қамоқ жазоси тайинлашни сўраган.
Судда кўз ёш билан ҳимоя нутқини сўзлаган Туғян Улкем Гултер эса ўзига қўйилган айбловларни рад этган. У онасининг йиқилган пайтини кўрмаганини ва ўзига туҳмат қилинганини билдирган.
“Мен ўзимга қўйилган айбловларни тан олмайман. Онамнинг йиқилган пайтини мутлақо кўрмаганман. Ҳар қандай она ва қиз ўртасида жанжаллар бўлиши мумкин, лекин биз она ва қиз эдик. Мен жабрланувчиман. Менга туҳмат қилишди. Ижтимоий тармоқлар ва матбуотда мени “она қотили” деб аташмоқда. Онамнинг ўлими билан боғлиқ қайғуни ҳам бошдан кечира олмадим. Мен илоҳий адолатга ишонаман. Қандай жазо тайинланишидан қатъи назар, ўзимнинг айбсиз эканимни биламан. Менга туҳмат қилганларни кечирмайман. Охиратда илоҳий суд олдига онам билан қўл ушлашиб чиқишимга ишонаман. Қизим бу доғни кўтариб юришини истамайман”, деган у.
Судланувчи ва унинг адвокатлари сўнгги ҳимоя нутқларини сўзлаб бўлгач, суд ҳайъати ҳукмни эълон қилган. Унга кўра, Туғян Улкем Гултер онасини олдиндан режалаштириб, қасддан ўлдиришда айбдор деб топилиб, оғирлаштирилган умрбод қамоқ жазосига ҳукм қилинган.
