Россия Президенти Владимир Путин ва АҚШ Президенти Дональд Трамп телефон орқали мулоқот қилиб, Украина ва Эрондаги вазият, шунингдек, икки давлат ўртасидаги иқтисодий ҳамкорлик масалаларини муҳокама қилди. Бу ҳақда Кремль хабар берди.
Кремль маълумотига кўра, суҳбат давомида Эрон атрофидаги вазият ва Россия–АҚШ муносабатларининг турли жиҳатлари ҳам кўриб чиқилган. Москва Америка ва жаҳон бозорларига нефть ҳамда нефть маҳсулотларини етказиб беришга тайёрлигини билдирган.
АҚШ Президенти Дональд Трамп эса энергетика соҳасида йирик келишувга эришилганини маълум қилган. Унинг сўзларига кўра, Россия ўз нефтьни қайта ишлаш заводларининг имкониятларидан келиб чиқиб, АҚШ ва жаҳон бозорига энг қисқа муддатларда 3 миллион тоннагача дизель ёқилғиси етказиб бериши мумкин.
Россия дастлаб 300 минг тонна дизель ёқилғисини етказиб беришга, ноябрь ойида яна 500 минг тонна, кейин эса қўшимча 1 миллион тонна маҳсулот юборишга тайёрлигини билдирган. Бу маълумотни Россия Бош вазири ўринбосари Александр Новак ҳам тасдиқлаган.
Шунингдек, АҚШ Молия вазирлиги ҳузуридаги Хорижий активларни назорат қилиш бошқармаси (OFAC) Россия дизель ёқилғисини етказиб бериш билан боғлиқ операцияларга рухсат берувчи вақтинчалик умумий лицензия чиқаришини маълум қилган. Ушбу рухсат дизель ёқилғисини сотиш, етказиб бериш, тушириш ва импорт қилиш, жумладан, АҚШга олиб кириш билан боғлиқ операцияларни 7 апрелгача амалга ошириш имконини беради.
