Ҳиндистоннинг Маҳараштра штатида оилавий жанжал ортидан уч киши — 18 ёшли йигит ва унинг ота-онаси жарликдан қулаган ҳолда ҳалок бўлди. Ҳодисага йигитнинг муддатли тўлов асосида сотиб олган iPhone телефони учун навбатдаги тўловни амалга ошира олмагани сабаб бўлгани айтилмоқда. Бу ҳақда NDTV маълум қилди.
Полиция маълумотига кўра, Кунал исмли 18 ёшли йигит iPhone сотиб олган ва унинг тўловларини амалга ошириш учун оиласидан пул сўраган. Навбатдаги тўлов масаласида отаси билан жанжаллашган Кунал 22 август куни эрталаб уйидан чиқиб, яқиндаги тоғга борган.
Унинг ортидан ота-онаси ва маҳаллий аҳоли борган. Улар қарийб уч соат давомида йигитни ўз фикридан қайтаришга уринган. Ҳатто айримлар унга iPhone 15 Pro олиб беришни ваъда қилган.
Бироқ Кунал ўз ниятидан қайтмаган. Воқеа жойида бўлганлар унинг ҳаётини сақлаб қолишга уриниб, онаси учун яшашга чақирган.
Кейинчалик Куналнинг отаси Мурлидхар Чандгуде ўғлини орқага тортиб олишга уринган. Аммо уларнинг иккаласи ҳам мувозанатни йўқотиб, жарликка қулаган. Эри ва ўғлининг қулаганини кўрган онаси Санжита ҳам бир неча сониядан сўнг пастга сакраган.
Учаласи ҳам воқеа жойида ҳалок бўлган. Уларнинг жасадлари олиб чиқилиб, суд-тиббий экспертизасига юборилган.
Ҳодиса юзасидан жиноят иши қўзғатилиб, тергов ҳаракатлари олиб борилмоқда. Полиция оилавий жанжалнинг барча тафсилотлари, шунингдек, Куналнинг руҳий ҳолати ҳақида қўшимча маълумот бермаган.
