Россия президенти Владимир Путин Украина Россиянинг иқтисодий инфратузилмасига ҳужумлар орқали "Пандора қутиси"ни очганини айтди. Унинг таъкидлашича, Москва бунга жавобан Украинанинг "энг сезгир иқтисодий соҳалари"га зарба бериши мумкин. Бу ҳақда Reuters маълум қилди.
Украина сўнгги ойларда Россиянинг нефтьни қайта ишлаш заводлари, онлайн савдо компаниялари омборлари ва бошқа иқтисодий инфратузилмаларига дронлар орқали ҳужумларни кучайтирган. Киев бундай объектларни Россиянинг уруш салоҳияти учун муҳим инфратузилма деб ҳисоблайди.
"Киев режими иқтисодиётимизга зарар етказишга киришди. Нима қилди? Ўзи бу Пандора қутисини очди. Унда жавоб бўлади — энг сезгир иқтисодий соҳаларингизга зарбалар кутилади", — деди Путин Россия давлат телеканали журналистига берган изоҳида.
Путин шунингдек, Украинага қарши ҳужумлар қишлоқ хўжалиги маҳсулотлари экспортига таъсир кўрсатаётганига қарамай, жаҳон бозорида озиқ-овқат танқислиги юзага келмаслигини айтди. Унинг сўзларига кўра, Россия ўз маҳсулотларини экспорт қилишдаги қийинчиликларни ҳал қилиши ва Украина экспорти ўрнини қоплаши мумкин.
Россия президенти тинчлик музокараларига тайёр эканини ҳам яна бир бор таъкидлади. Бироқ у музокаралар "жойлардаги реал воқеликлар" асосида олиб борилиши кераклигини айтди ва воситачилар орқали Украина томонидан билдирилган айрим таклифларни "экзотик" деб атади.
