ChatGPT 24 августдан бошлаб Европанинг 31 мамлакатидаги фойдаланувчиларга реклама кўрсата бошлайди. Бу ҳақда чатбот яратувчиси OpenAI маълум қилди.
Рекламалар ChatGPT’нинг бепул ва энг арзон Go тарифи фойдаланувчиларига кўрсатилади. Plus, Pro ва Enterprise обуналари эгалари эса рекламаларсиз фойдаланишда давом этади.
OpenAI ҳозирча 31 давлатнинг тўлиқ рўйхатини очиқламаган. Улар орасида Германия, Франция, Испания, Италия, Швеция, Норвегия, Дания, Нидерландия ва Австрия бор.
Компания ChatGPT’да рекламаларни АҚШда 2026 йил февралда синовдан ўтказишни бошлаган. Европа бозорига чиқиш эса дастурнинг ишга туширилганидан кейинги энг йирик кенгайиши бўлади.
OpenAI таъкидлашича, рекламалар чатбот жавобларидан алоҳида кўрсатилади ва улар жавоблар мазмунига таъсир қилмайди. 18 ёшга тўлмаган фойдаланувчиларга эса реклама кўрсатилмайди.
