Ўзбекистонда ноқонуний миграцияни ташкил этганлик учун жиноий жавобгарлик белгилаш таклиф этилмоқда. Мазкур ташаббус Миграция агентлиги томонидан илгари сурилган бўлиб, тегишли қонун лойиҳаси жамоатчилик муҳокамасига қўйилди.
Лойиҳага кўра, Жиноят кодексини 223-1-модда — "Ноқонуний миграцияни ташкил этиш" билан тўлдириш таклиф қилинмоқда.
Унга мувофиқ, қонунчиликда белгиланган тартибни бузган ҳолда иқтисодий фойда олиш мақсадида ноқонуний миграцияни ташкил этиш, шунингдек, чет эл фуқаролари, фуқаролиги бўлмаган шахслар ёки Ўзбекистон фуқароларини мамлакатга олиб кириш, давлат чегараси орқали олиб ўтиш, хорижга олиб чиқиш ёки Ўзбекистон ҳудуди орқали бошқа давлатга ноқонуний транзитини ташкил этиш, раҳбарлик қилиш ёки бундай фаолиятга кўмаклашиш учун жавобгарлик белгиланиши мумкин.
Бундай ҳаракатлар, жумладан, транспорт воситаси ёки турар жой билан таъминлаш орқали амалга оширилган бўлса, уч йилдан беш йилгача озодликни чеклаш ёки озодликдан маҳрум қилиш жазоси қўлланилиши таклиф этилмоқда.
Агар ушбу ҳаракатлар:
— йирик миқдорда;
— бир гуруҳ шахслар томонидан;
— мансабдор шахслар томонидан;
— такроран ёки хавфли рецидивист томонидан;
— уюшган гуруҳ томонидан ёки унинг манфаатларини кўзлаб содир этилса,
беш йилдан ўн йилгача озодликдан маҳрум қилиш жазоси белгиланиши мумкин.
Ноқонуний миграция билан боғлиқ ҳаракатлар ўта йирик миқдорда, инсон ҳаёти ёки соғлиғи учун хавфли усулда содир этилган ёки бошқа оғир оқибатларга олиб келган бўлса, ўн йилдан ўн беш йилгача озодликдан маҳрум қилиш жазоси қўлланилиши таклиф этилмоқда.
Миграция агентлигига кўра, қонуннинг қабул қилиниши ноқонуний миграция соҳасидаги жиноятлар учун жавобгарликнинг муқаррарлигини таъминлаш, шунингдек, миллий қонунчиликни замонавий халқаро стандартлар ва илғор хорижий тажриба асосида такомиллаштиришга хизмат қилади.
