Тошкент шаҳрида яширин усулда тарқатиш учун тайёрланган 1,7 килограммдан ортиқ синтетик гиёҳвандлик воситалари мусодара қилинди. Гумонланувчи ЙПХ ходимлари текшируви вақтида қочишга уринган. Бу ҳақда Тошкент шаҳар Ички ишлар бош бошқармаси хабар берди.
Маълум қилинишича, ҳолат «Уч қаҳрамон» йўл-патруль хизмати масканида аниқланган. ЙПХ инспекторлари Spark русумли автомобилни тўхтатиб текширганида, йўловчилардан бири шубҳали ҳаракатлар қилган. У шахсий кўрик вақтида қочишга уринган, бироқ ходимлар томонидан ушланган.
Унинг ёнидан яширин усулда тарқатиш учун қадоқланган синтетик гиёҳвандлик воситалари топилган. Шундан сўнг, Юнусобод тумани ички ишлар органлари ва Давлат хавфсизлик хизмати ходимлари гумонланувчининг хонадонини холислар иштирокида кўздан кечирган.
Тезкор тадбир давомида хонадондан 1 килограмм 500 грамм мефедрон, 120 грамм «альфа-PVP» ва 100 грамм «спайс» мусодара қилинган. Шунингдек, гиёҳвандлик воситаларини қадоқлаш учун ишлатиладиган пакетлар, респиратор ва тарозилар ашёвий далил сифатида олинган.
Терговга оид видеода гумонланувчи интернет орқали иш излагани ва гиёҳвандлик воситаларини тарқатишга рози бўлганини айтган. У мефедрон, «скорост» ва «спайс» деб аталадиган моддаларни тарқатиш учун тайёрлаб қўйганини, бу фаолият учун жиноий жавобгарлик борлигини билганини билдирган.
