Ўзбекистон дунёнинг энг қудратли ва таъсирли мамлакатлари рейтингида 71-ўринни эгаллади. Бу ҳақдаги маълумотлар “World Population Review” сайтида эълон қилинди.
Рейтингда Марказий Осиё давлатлари орасида фақат Қозоғистон биринчи 50 таликдан жой олган. Ўзбекистон эса 100 та мамлакатни қамраб олган рўйхатда 71-поғонадан ўрин олди. Қирғизистон, Тожикистон ва Туркманистон рейтингга киритилмаган.
Рейтингнинг биринчи ўрнини Хитой эгаллаган. АҚШ иккинчи, Ҳиндистон эса учинчи бўлган. Шунингдек, Германия, Япония, Жанубий Корея, Франция, Буюк Британия, Мексика ва Италия кучли ўнталикдан жой олган. Россия эса 11-ўринни банд этган.
Рўйхатнинг қуйи поғоналаридан Сейшел ороллари, Ироқ, Панама, Баҳрайн, Албания, Зимбабве, Мўғулистон, Ливан ва Кипр ўрин олган.
Қайд этиш жоизки, рейтинг “U.S. News & World Report” нашри томонидан Пенсильвания университетининг Уортон мактаби ҳамда “BAV Group” билан ҳамкорликда ўтказиладиган “Best Countries” тадқиқоти маълумотлари асосида шакллантирилади.
Мамлакатларни баҳолашда уларнинг ҳарбий қудрати, иқтисодий салоҳияти, сиёсий таъсири, нуфузли геосиёсий блоклардаги иштироки ҳамда халқаро савдо-иқтисодий жараёнларга таъсири каби омиллар ҳисобга олинади.
