Тошкент ҳалқа автомобиль йўлида ЙПХ ходимларининг тўхташ талабига бўйсунмай, қочишга уринган Malibu-2 ҳайдовчиси ушланди. Бу ҳақда Тошкент шаҳар Ички ишлар бош бошқармаси хабар берди.
Маълум қилинишича, воқеа 19 август куни содир бўлган. Давлат рақам белгиси бўлмаган, олд ён ойналари қорайтирилган ва орқа қисмига қўшимча антенна ўрнатилган Malibu-2 автомобили Учқахрамон томондан Ҳасанбой йўналишида ҳаракатланган.
ЙПХ инспекторлари автомобилни тўхтатишга уринган. Бироқ ҳайдовчи қонуний талабни бажариш ўрнига автомобилни кескин равишда орқага буриб, ҳаракатини давом эттирган.
Кўрилган чоралар натижасида транспорт воситаси тўхтатилиб, ҳайдовчи ушланган.
Ҳолат юзасидан ҳайдовчига нисбатан белгиланган тартибда маъмурий баённома расмийлаштирилган. Malibu-2 вақтинча сақлаш учун жарима майдонига жойлаштирилган.
Мазкур ҳолат акс этган видео ижтимоий тармоқларда тарқалганидан сўнг кенг муҳокамага сабаб бўлди. Кадрларда давлат рақам белгисиз ва ойналари қорайтирилган Malibu-2нинг қарама-қарши йўналишда ҳаракатлангани, шунингдек, автомобилнинг орқа қисмида қўшимча антенна борлиги акс этган.
Шундан сўнг ўзини қоидабузар ҳайдовчининг отаси сифатида таништирган шахс видеони тарқатган фойдаланувчилардан бири билан боғланган. У видеони олиб ташлашни сўраган.
Тармоқларда тарқалган аудиоёзувда эркак ўғлини ҳайдовчилик ҳуқуқидан маҳрум қилишлари мумкинлигини айтган ва масалани пул билан ҳам ҳал қила олмаётганидан норози бўлган.
Видеони ўчириш талаби рад этилгач, у фойдаланувчига нисбатан ҳақоратли сўзлар ишлатган, унинг олдига бориш билан таҳдид қилган ва босим ўтказишга уринган.
