АҚШ Президенти Дональд Трамп Россия Президенти Владимир Путин билан учрашишни исташини, бироқ бу мулоқот Украинадаги уруш якунига яқинлашган пайтда ўтказилиши кераклигини айтди. Бу ҳақда у Оқ уйда журналистлар саволларига жавоб бераётганида маълум қилди.
Трамп Украинадаги уруш умуман бошланмаслиги керак эди, деб ҳисоблашини таъкидлади. Унинг фикрича, агар 2020 йилги АҚШ президентлик сайловлари сохталаштирилмаганида, Украинада уруш юз бермаган бўлар эди.
“Мен 2016 йилдан 2020 йилгача у ерда бўлдим. Путин билан гаплашардим, аммо бу ҳеч қачон содир бўлмас эди. Бунга ҳеч қандай имконият йўқ эди”, деди Трамп.
АҚШ Президенти урушни “ақлсизлик” деб атади. Унинг айтишича, ҳар ой ўртача 25 минг нафар ҳарбий ҳалок бўлмоқда.
“Бу бутун бир стадион эканини тасаввур қила оласизми? Ўртача 25 минг киши”, деди у.
Трамп ҳалок бўлаётганлар орасида украиналиклар ҳам кўп эканини таъкидлади. Шу билан бирга, унинг сўзларига кўра, Россия қўшинлари ҳужум қилаётгани сабабли рус ҳарбийлари орасидаги йўқотишлар ҳам юқори бўлиши мумкин.
“Россияликлар ҳам кўп ҳалок бўлмоқда. Эҳтимол, руслар кўпроқдир, чунки улар олдинга силжимоқда. Улар мудофаа қилмаяпти, ҳужум қилмоқда, ҳужум вақтида эса кўпроқ одам ҳалок бўлади. Аммо украиналик ва россиялик ҳарбийларнинг жуда кўпи ҳалок бўлмоқда. Улар бу аҳмоқона урушни тўхтатиши керак”, деди Трамп.
Шунингдек, Трамп президентлиги даврида “саккизта урушни тўхтатгани” ҳақидаги даъвоcини яна бир бор такрорлади. У айрим можароларни тугатиш Украинадаги урушга қараганда анча мураккаб бўлганини айтди.
АҚШ раҳбари Россия ва Украина президентлари ўртасида “жуда катта адоват” мавжудлигини ҳам таъкидлади. Бироқ Трамп икки томон ҳам урушни тугатишга яқинлашган, деб ҳисоблашини билдирди.
“Мен иккаласи билан ҳам ишлаяпман ва улар буни тўхтатади, деб ўйлайман”, деди у.
Трамп Россия Президенти билан саммит ўтказишни хоҳлашини, аммо бу учрашув тинчлик келишувига эришиш учун шароит пайдо бўлганидан кейин ўтказилиши кераклигини таъкидлади.
“Мен Россия, Украина — ҳамма билан яхши муносабатларга эга бўлишимизни хоҳлайман. Бу бизнес учун ҳам жуда яхши бўлар эди. Россиянинг улкан ҳудудлари ва жуда қимматли ерлари бор, у ерда кўп яхши ишлар амалга оширилмоқда”, деди АҚШ Президенти.
Трамп Путин билан учрашувни исталган пайтда ташкил қилиш мумкинлигини ҳам айтди. Бироқ у саммитни “уруш тугай бошлаганида” ўтказишни хоҳлашини билдирди.
“Биз учрашув ўтказишимиз мумкин. Ишонинг, мен буни дарҳол ташкил қила оламан. Аммо мен бу учрашувни уруш тугай бошлаганида ўтказишни хоҳлайман. Менимча, шундай бўлади”, деди Трамп.
