6 октябрь куни Найроби–Лагос йўналишида парвоз қилаётган самолётда йўловчилардан бири экипаж аъзоларига қаршилик кўрсатиб, учувчилар кабинаси ва самолёт эшигини очишга уринган. Кейинчалик у вафот этган. Бу ҳақда Нигерия Фуқаро авиацияси бошқармасига таяниб, “Legit.ng” хабар берди.
Маълум қилинишича, йўловчи дастлаб авиакомпания томонидан Мадагаскарга олиб борилган. Бироқ у мамлакат божхона органлари томонидан ортга қайтарилиб, Мадагаскарга киришига рухсат берилмаган. Шундан сўнг “Kenya Airways” уни яна Нигерияга қайтаришга мажбур бўлган.
Қайтиш парвози вақтида эркак тажовузкор ҳаракат қила бошлаган. У дастлаб учувчилар кабинасига киришга уринган, аммо бунга эриша олмаган. Кейин эса самолётнинг орқа эшигини очишга ҳаракат қилган.
Бошқа йўловчилар хавфсизлигини таъминлаш мақсадида экипаж аъзолари уни ушлаб, қўлларини орқасидан боғлаб қўйган. Ижтимоий тармоқларда тарқалган видеода эркак самолёт ҳавода бўлган пайтда эшикни очишга уринаётгани акс этган.
“Kenya Airways” маълум қилишича, самолёт Лагосга қўнишига тахминан 20 дақиқа қолганда йўловчи ҳушсиз ҳолатга келган. Экипаж унга зудлик билан биринчи тиббий ёрдам кўрсатган.
Самолёт Лагосдаги Муртала Муҳаммад халқаро аэропортига тахминан соат 21:41 да қўнган. Шундан сўнг тиббиёт ходимлари йўловчини кўздан кечирган, бироқ унинг вафот этгани аниқланган.
Ҳозирча марҳумнинг шахси, фуқаролиги, ёши ва ўлим сабаби ошкор қилинмаган. Ҳодиса юзасидан Нигерия полицияси тергов олиб бормоқда.
Нигерия Фуқаро авиацияси бошқармаси вакили Майкл Ачимугум тергов якунлангунига қадар ҳодиса сабаблари бўйича хулоса қилмасликка чақирган. Унинг сўзларига кўра, марҳумнинг оиласи зарур деб топса, суд-тиббий экспертиза ўтказилишини сўраши мумкин.
“Kenya Airways” марҳумнинг яқинларига ҳамдардлик билдириб, тергов доирасида маҳаллий органлар ва авиация назорати идоралари билан ҳамкорлик қилишини маълум қилган.
