Шри-Ланканинг собиқ президенти Маҳинда Ражапаксанинг рафиқаси, мамлакатнинг собиқ биринчи хоними Ширанти Ражапакса болалар шифохонаси учун йиғилган хайрия маблағларидан ноқонуний фойдаланишда гумонланиб ушланди. Бу ҳақда хорижий ОАВ хабар берди.
Қайд этилишича, 73 ёшли Ширанти Ражапакса Коломбодаги уйида коррупцияга қарши курашувчи идора ходимлари томонидан ушланган. У собиқ президент оиласи билан боғлиқ “Siriliya Saviya” хайрия жамғармаси томонидан йиғилган 10 млн Шри-Ланка рупияси, яъни қарийб 30,3 минг АҚШ доллари билан боғлиқ ҳолат юзасидан сўроқ қилинмоқда.
Мазкур маблағ Коломбодаги Леди Риджвей болалар шифохонаси учун махсус сканер харид қилишга сарфланиши керак бўлган. Бироқ расмийлар шунга ўхшаш сканер Хитой ҳукумати томонидан шифохонага аллақачон етказиб берилганини билдирган.
Ширанти Ражапакса ўзига қўйилаётган айбловларни рад этган. У хайрия маблағлари ўзлаштирилмаганини айтган. Собиқ президент Маҳинда Ражапаксанинг вакили ҳам пуллар “Siriliya Saviya” жамғармаси ҳисобларида сақланаётганини билдирган.
Маълум бўлишича, Ширанти Ражапакса 5 октябрь куни даволаниш учун бўлиб турган Сингапурдан Шри-Ланкага қайтган. У ҳибсга олинмаслик учун судга мурожаат қилган, бироқ иш бўйича суд мажлиси 12 октябрга белгиланган.
Маълумот учун, Маҳинда Ражапакса 2005–2015 йилларда Шри-Ланка президенти бўлган. 2022 йилда мамлакатда иқтисодий инқироз ва инфляция сабабли оммавий норозиликлар кучайган ва унинг укаси Готабая Ражапакса президентлик лавозимини тарк этган.
Шунингдек, Шри-Ланкада Ражапакса оиласи аъзоларига нисбатан аввал тўхтаб қолган коррупцияга оид терговлар қайта тикланган. Маҳинда ва Ширанти Ражапаксанинг катта ўғли Намал Ражапакса ҳам жорий йилда самолёт хариди билан боғлиқ иш доирасида ҳибсга олинган. Унинг укаси Йошита Ражапакса ҳам коррупцияга оид айбловлар билан қўлга олинган.
