Жанубий Кореяда тўрт нафар Ўзбекистон фуқароси Суриядаги террорчилик гуруҳига пул ва транспорт воситаларини юборганликда гумонланиб, терговга жалб қилинди. Улар терроризмни молиялаштиришга қарши кураш тўғрисидаги қонунни бузганликда гумонланмоқда. Бу ҳақда Кореянинг “Ёнҳап” агентлиги хабар берди.
Маълум қилинишича, гумонланувчилардан бири 2025 йил апрелидан бошлаб қарийб саккиз ой давомида БМТнинг террорчилик ташкилотлари рўйхатига киритилган “Катибат ат-Тавҳид вал-Жиҳод” гуруҳига 6,3 миллион вон, яъни тахминан 4600 АҚШ доллари миқдорида криптовалюта юборганликда гумон қилинмоқда.
30 ёшлар атрофидаги ушбу эркак шу даврда мазкур гуруҳдан криптовалюта олгани ҳам терговда аниқланган. У бу маблағларга умумий қиймати 170 миллион вон бўлган 11 та ишлатилган автомобиль ва иккита экскаватор сотиб олиб, уларни Сурияга жўнатгани айтилмоқда.
БМТ 2022 йилда “Ал-Қоида”га алоқадор “Катибат ат-Тавҳид вал-Жиҳод” гуруҳини террорчилик ташкилоти сифатида белгилаган.
Терговчиларнинг фикрича, гумонланувчининг гуруҳ билан расмий алоқаси бўлмаган. Бироқ у ташкилот аъзоси бўлган укаси билан алоқа ўрнатганидан кейин гуруҳни қўллаб-қувватлай бошлаган.
Гумонланувчи Интерпол томонидан қизил хабарнома орқали қидирувга берилганидан бир ой ўтиб, апрель ойида қўлга олинган. Шундан сўнг унга нисбатан қамоқ эҳтиёт чораси қўлланилиб, айблов эълон қилинган.
Қолган уч нафар Ўзбекистон фуқароси эса асосий гумонланувчига ишлатилган автомобилларни топиш ва бошқа масалаларда ёрдам берганликда гумонланмоқда. Улар ҳибсга олинмаган ва полиция томонидан сўроқ қилинган.
Шунингдек, асосий гумонланувчи ватандошларидан бирининг номига расмийлаштирилган ишлатилган автомобилларни экспорт қилиш компаниясини бошқаргани маълум бўлган.
Ҳозирда Жанубий Корея ҳуқуқни муҳофаза қилувчи органлари томонидан тергов ҳаракатлари давом эттирилмоқда.
