Инновацион ривожланиш агентлиги томонидан Ўзбекистон Республикаси мустақиллигининг 35 йиллиги муносабати билан стартап лойиҳаларга бағишланган “Demo Day” тадбири ўтказилди.
Тадбирда маҳаллий стартапчиларни йирик ишлаб чиқариш кластерлари билан боғлаш, инновацион ғояларни ишлаб чиқаришга жорий этиш ва истиқболли лойиҳаларга инвестиция жалб қилиш масалалари муҳокама қилинди.
“Demo Day”да 40 га яқин стартап лойиҳа муаллифлари ўз инновацион ишланмалари ва бизнес ғояларини тақдим этди.
Тадбирда инвесторлар, венчур жамғармалари вакиллари, йирик ишлаб чиқариш кластерлари раҳбарлари ҳамда тадбиркорлар — жами 60 га яқин иштирокчи қатнашди.
Стартапчилар ўз лойиҳаларининг имкониятлари ва ривожланиш истиқболлари ҳақида тақдимот қилди. Шундан сўнг инвесторлар ва кластер вакиллари ўзларини қизиқтирган лойиҳалар билан яқиндан танишиб, уларни молиялаштириш, ишлаб чиқаришга жорий этиш ва ҳамкорликни йўлга қўйиш масалаларини муҳокама қилди.
Тадбир стартап лойиҳаларини йирик бизнес вакиллари ҳамда инвесторлар билан боғлаш, инновацион ишланмаларни амалиётга татбиқ этиш ва истиқболли лойиҳаларни ривожлантириш учун мулоқот майдони бўлиб хизмат қилди.
