Тошкент вилояти, Тошкент шаҳри ва Наманган вилоятида ўтказилган тезкор тадбирларда гиёҳвандлик воситаларининг ноқонуний айланмаси билан шуғулланган шахслар ушланди. Улардан жами 12,7 килограмм гиёҳвандлик воситалари олинди. Бу ҳақда Давлат хавфсизлик хизмати хабар берди.
Маълум қилинишича, ДХХ Тошкент вилояти бўйича бошқармаси ҳамда вилоят Ички ишлар бош бошқармаси ходимлари ҳамкорлигида Бўстонлиқ туманида тезкор тадбир ўтказилган.
Унда Андижон вилояти Марҳамат туманида яшовчи, 2000 йилда туғилган шахс «Кобальт» русумли автомобилида ҳаракатланаётганда тўхтатиш ҳақидаги қонуний талабга бўйсунмай, қочишга уринган.
У автомобиль салонида бўлган 2 та ўрамдаги шубҳали моддани ташлаб юборган. Кейинчалик транспорт воситаси тўхтатилиб, унинг салонидан яна 2 та ўрамдаги модда олинган. Шунингдек, мазкур шахс қабул қилиб олиши керак бўлган геолокациядан яна бир ўрам топилган.
Экспертиза натижасида ушбу моддалар «гашиш» экани аниқланган. Уларнинг умумий оғирлиги 5 килограммни ташкил этган.
Яна бир тезкор тадбир Тошкент шаҳрининг Чилонзор туманида ўтказилган.
ДХХ Тошкент шаҳар бўйича бошқармаси ва Ички ишлар органлари ходимлари ҳамкорлигида 2005 йилда туғилган хорижий давлат фуқароси ушланган.
У текширилганда, ёнидан зип-пакетга солинган кукунсимон модда аниқланган. Шунингдек, у вақтинча яшаётган хонадон холислар иштирокида кўздан кечирилган.
Натижада турли озиқ-овқат маҳсулотлари номи остида қадоқланган пакетлардан 4 килограмм 133 грамм “3-хлорметкатинон”, 403 грамм амфетамин, 720 грамм МДМА ва 20 грамм кокаин топилган.
Шунингдек, Наманган вилоятининг Учқўрғон туманидаги чегара-божхона постида ҳам гиёҳвандлик воситаларининг ноқонуний олиб кирилишига чек қўйилган.
ДХХ Наманган вилояти бўйича бошқармаси, Чегара қўшинлари ҳамда Божхона органлари ходимлари ҳамкорлигида ўтказилган тезкор тадбирда қўшни давлатдан Ўзбекистонга кириб келган, Чортоқ туманида яшовчи, 2000 йилда туғилган шахс бошқарувидаги Laceti русумли автомобиль текширилган.
Текширув давомида автомобиль ёнилғи бакига яширилган 2 килограмм 513 грамм “Альфа-PVP” синтетик гиёҳвандлик воситаси аниқланган.
Шунингдек, мазкур шахс билан чегара-божхона постигача бирга келган ва постдан пиёда ўтиб, Ўзбекистон ҳудудида уни кутиб турган 2005 йилда туғилган чортоқлик шахс ҳам ушланган.
Қайд этилишича, ҳар учала ҳолат юзасидан гиёҳвандлик воситаларининг ноқонуний айланмаси билан шуғулланган шахсларга нисбатан жиноят ишлари қўзғатилиб, ҳозирда тергов ҳаракатлари олиб борилмоқда.
