АҚШ президенти Дональд Трампнинг махсус вакили Стив Уиткофф ва унинг куёви Жаред Кушнер бўлган самолёт 5 сентябрь куни Москвадаги "Внуково" аэропортига қўнди. Америка делегациясини Россия президентининг махсус вакили Кирилл Дмитриев кутиб олди. Бу ҳақда "Meduza" хабар берди.
Маълум қилинишича, АҚШ Ҳарбий-ҳаво кучларининг SAM934 рейси Майами халқаро аэропортидан учиб, Хельсинкида тўхтаган ва кейин Москвага йўл олган.
Уиткофф ва Кушнер Россия ҳамда Украина ўртасидаги урушни тугатиш бўйича АҚШнинг асосий музокарачилари ҳисобланади. Трамп улар Москва ва Киевга урушни якунлаш бўйича таклиф билан бораётганини айтган.
"Агар бирор нарса қилиш мумкин бўлса, буни билиш учун уларни юбордик. Буни уддалай олишимиз мумкин", — деди Трамп.
Axios ва The New York Times маълумотларига кўра, Уиткофф ва Кушнер 5 сентябрь куни Москвада Владимир Путин билан музокара ўтказиши, 6 сентябрь куни эса Киевга бориб, Владимир Зеленский билан учрашиши кутилмоқда.
Зеленский америкалик вакилларнинг ташрифи давомида Россия ҳаво ҳудудининг нормал ишлашини таъминлашни сўраган. Шунингдек, у Вашингтон билан музокаралар ўтказилаётган пайтда Россияни Украинага ҳаво зарбаларини тўхтатишга чақирган.
