Индонезияда Анак Кракатау вулқони отилиши ортидан саккизта аэропорт фаолияти вақтинча тўхтатилди. Бунинг оқибатида қарийб 170 минг нафар йўловчи қолиб кетган, 1 558 та авиарейс кечиктирилган. Бу ҳақда BBC нашри хабар берди.
Вулқон кули ҳавога тарқалгани сабаб Жакартадаги Сукарно-Хатта халқаро аэропорти биринчи бўлиб ёпилган. Кейинчалик кул Ғарбий Ява томон тарқалгани аниқлангач, яна бир нечта аэропортда парвозлар тўхтатилган.
Чекловлар асосан Сингапур, Доҳа, Сидней ва Куала-Лумпур йўналишларидаги халқаро рейсларга таъсир қилган. Аэропортлар фаолияти ярим тунга қадар тўхтатилиши айтилган.
Анак Кракатау жума куни кечқурун отила бошлаган, якшанба куни эса яна икки марта отилиш қайд этилган. Вулқон кули Ява томонида 6 километр, Суматра томонида 15 километр баландликкача кўтарилган.
Мутасаддилар вулқон фаоллиги сабаб цунами хавфи йўқлигини билдирган. Шу билан бирга, аҳолига уйдан чиқмаслик ва вулқон кулидан ҳимояланиш учун ниқоб тақиш тавсия қилинган. Айрим ҳудудларда мактаблардаги машғулотлар ҳам бекор қилинган.
