АҚШ Президенти Дональд Трамп фаолиятини қўллаб-қувватловчи америкаликлар улуши рекорд даражада пасайди. Сўров натижаларига кўра, президентни қўллаб-қувватлаш даражаси 33 фоизни ташкил этган. Бу ҳақда “Financial Times” хабар берди.
Республикачилар орасида ҳам Трампни қўллаб-қувватлаш даражаси 72 фоизга тушган.
Сўровда иштирок этганларнинг қарийб учдан икки қисми АҚШ иқтисодиёти нотўғри йўналишда ҳаракатланаётганини билдирган. Респондентларнинг 57 фоизи эса Трамп президентлиги даврида молиявий аҳволи ёмонлашганини айтган.
Президентнинг иқтисодий сиёсатини қўллаб-қувватлаётган республикачилар улуши ҳам бир ой ичида қарийб 8 фоиз пунктга камайиб, 53 фоизга тушган.
Оқ уйнинг савдо сиёсати ҳам сайловчиларнинг норозилигига сабаб бўлмоқда. Сўровда қатнашганларнинг 56 фоизи Канада товарларига 50 фоизлик бож жорий этилишини қўллаб-қувватламаган. Мустақил сайловчиларнинг 60 фоизи ва республикачиларнинг қарийб учдан бир қисми ҳам бу чорага қарши чиққан.
Трамп рейтингидаги пасайиш АҚШ Конгрессига оралиқ сайловларга икки ойдан кам вақт қолган пайтга тўғри келмоқда.
Тадқиқот иштирокчиларининг қарийб 46 фоизи Трампнинг сайлов кампаниясида фаол иштирок этиши республикачи номзодларнинг имкониятларини пасайтириши мумкинлигини билдирган.
АҚШда оралиқ сайловлар 3 ноябрь куни ўтказилади. Унда Вакиллар палатасининг барча 435 ўрни ҳамда Сенатдаги ўринларнинг тахминан учдан бир қисми учун сайлов бўлиб ўтади.
Айни пайтда Конгресснинг ҳар икки палатасида республикачилар кўпчиликни ташкил этмоқда. Сайлов натижалари Трамп президентлик муддатининг сўнгги икки йилида Конгрессдаги сиёсий кучлар нисбатига таъсир қилади.
