Туркиялик 51 ёшли актёр Серҳат Мустафо Қилич 5 сентябрь куни Истанбулнинг Қоғитхона туманидаги уйида вафот этган ҳолда топилди.
Маълумотларга кўра, актёрдан бир неча кун давомида хабар ололмаган яқинлари унинг Нуртепе маҳалласидаги уйига борган. Қилич меҳмонхонадаги креслода ҳаракатсиз ҳолда топилган.
Воқеа жойига етиб келган тиббий гуруҳлар унинг вафот этганини аниқлаган. Ҳозирда полиция актёрнинг ўлими юзасидан текширув олиб бормоқда.
Серҳат Мустафо Қилич 1975 йилда туғилган бўлиб, 30 йилдан ортиқ ижодий фаолияти давомида кўплаб фильм ва сериалларда турли образларни ижро этган.
У томошабинларга "Seksenler" ("Саксонлар") сериалидаги Эргун Плак, "Söz" ("Сўз") сериалидаги Чўлак, "Ezel" ("Эзел"), "Maraşlı" ("Марашли") ва "Kuruluş: Osman" ("Усмоннинг ташкил топиши") сериалларидаги роллари орқали танилган.
Актёр кино, телевидение ва театр соҳаларидаги фаолияти билан танилган бўлиб, турли характердаги образларни маҳорат билан ижро этган.
