Тошкент вилоятининг Тошкент туманида ҳоким ўринбосари тадбиркордан 25 минг АҚШ доллари талаб қилганликда гумонланмоқда. Бу ҳақда Давлат хавфсизлик хизмати хабар берди.
Маълум қилинишича, мансабдор шахс тадбиркорга қурилиш технологиялари ва композит эшиклар ишлаб чиқариш саноат мажмуасини ташкил этиш учун туман ҳокимлиги балансидаги 1 гектар ер майдонини аукцион савдоларига чиқариб, олиб беришни ваъда қилган.
Бунинг эвазига у давлат активларини бошқариш тизимидаги танишлари орқали масалани ҳал қилиб беришини айтиб, 25 минг доллар талаб қилган.
Давлат хавфсизлик хизматининг Тошкент вилояти бўйича бошқармаси ходимлари томонидан ўтказилган тезкор тадбирда ҳоким ўринбосари сўралган пулни олаётган вақтида ашёвий далиллар билан ушланган.
