АҚШ Давлат котиби Марко Рубионинг Ўзбекистонга ташрифи хорижий оммавий ахборот воситалари эътиборини тортди. Халқаро нашрлар ушбу ташрифни АҚШнинг Марказий Осиёга нисбатан ташқи сиёсатида минтақанинг геосиёсий ва иқтисодий аҳамияти ортиб бораётгани билан боғламоқда.
Жумладан, Reuters агентлиги Марказий Осиёнинг АҚШ ташқи сиёсатидаги ўрнига эътибор қаратган. Нашрда қайд этилишича, табиий ресурсларга бой минтақа Вашингтон учун иқтисодий ҳамкорликни кенгайтириш ва савдо алоқаларини ривожлантириш нуқтаи назаридан муҳим аҳамият касб этмоқда.
Шунингдек, AFP ахборот агентлиги материалларини эълон қилган Yahoo News ва Barron’s каби нашрларда ҳам АҚШнинг Марказий Осиёдаги дипломатик фаоллигига эътибор қаратилган.
Хорижий ОАВдаги материалларда Вашингтоннинг минтақа давлатлари, хусусан, Ўзбекистон билан ҳамкорликни ривожлантиришга интилаётгани таъкидланмоқда. Бунда иқтисодий алоқаларни кенгайтириш, инвестицияларни жалб қилиш ва минтақавий хавфсизлик масалалари муҳим ўрин тутади.
Қайд этиш жоизки, Марко Рубионинг ташрифи Ўзбекистон ва АҚШ ўртасидаги муносабатлар, шунингдек, Вашингтоннинг Марказий Осиё давлатлари билан ҳамкорлик истиқболларини муҳокама қилиш учун муҳим дипломатик воқеа ҳисобланади.
