АҚШ Марказий Осиё давлатлари билан иқтисодий алоқаларни кенгайтириш ва узоқ муддатли ҳамкорликни йўлга қўйишга интилмоқда. Америкалик компаниялар Ўзбекистонда бир қатор янги келишувларни эълон қилишга тайёрланмоқда. Бу ҳақда АҚШ Давлат котиби Марко Рубио «Еuronews» телеканалига берган интервьюсида маълум қилди.
Рубио Самарқандга ташрифи давомида АҚШ компаниялари Ўзбекистон билан савдо келишувларини тузиш ва стратегик аҳамиятга эга минерал ресурслар соҳасида ҳамкорлик қилишдан манфаатдор эканини айтди.
"Менимча, биз бир нечта аниқ келишувлар тузилганини эълон қила оламиз", деди АҚШ Давлат котиби журналистлар билан суҳбатда.
Унинг сўзларига кўра, Америка компаниялари Ўзбекистонда бизнес юритишга қизиқиш билдирмоқда. Янги келишувлар ҳақидаги тафсилотлар Самарқанддаги бизнес учрашувлари якунлари бўйича маълум қилинади.
"Бу якуни эмас. Бу — бошланиши", дея қўшимча қилди Рубио.
АҚШ Давлат котиби Вашингтон Марказий Осиёга аввалгидан кўра кўпроқ эътибор қаратиши кераклигини таъкидлади. Унинг фикрича, минтақа давлатлари билан иқтисодий алоқаларни мустаҳкамлаш АҚШ ва Марказий Осиё мамлакатлари ўртасидаги муносабатларни янги босқичга олиб чиқиши мумкин.
Маълумот учун, 19 октябрь куни Самарқандда АҚШ ва Марказий Осиёнинг бешта давлати ташқи ишлар вазирлари иштирокида "C5+1" форматидаги учрашув ўтказилмоқда. Тадбирлар доирасида савдо, инвестиция, энергетика, транспорт ва муҳим минераллар соҳасидаги ҳамкорлик масалалари муҳокама қилинмоқда. АҚШ Давлат котибига қарийб 300 та Америка компанияси вакиллари ҳамроҳлик қилмоқда.
