Наманган вилояти Косонсой тумани ҳокими ўринбосари тадбиркорга ажратилган ер майдонини бошқа шахсга олиб бериш билан қўрқитиб, ундан 65 млн сўмлик манфаат талаб қилганликда гумонланиб ушланди. Бу ҳақда Давлат хавфсизлик хизмати хабар берди.
Маълум қилинишича, мансабдор шахс ҳокимлик томонидан маҳаллий тадбиркорга ижара асосида берилган ерни бошқа тадбиркорга олиб бериш билан таҳдид қилган. Эвазига эса ўз хонадонига 20 кВт қувватли қуёш панелларини ўрнатиб беришни талаб қилган.
Давлат хавфсизлик хизматининг Наманган вилояти бўйича бошқармаси ходимлари Бош прокуратура ҳузуридаги Департамент билан ҳамкорликда ўтказган тезкор тадбирда ҳоким ўринбосари қуёш панелларини сотиб олиш ва ўрнатиш харажатлари учун мўлжалланган 65 млн сўмни хизмат автомашинасида олаётган вақтида ашёвий далиллар билан ушланган.
Ҳолат юзасидан мансабдор шахсга нисбатан Жиноят кодексининг 210-моддаси (пора олиш) билан жиноят иши қўзғатилган. Ҳозирда тергов ҳаракатлари олиб борилмоқда.
