АҚШ келажакда астронавтларни Халқаро космик станциядаги каби Ойга ҳам узоқ муддатли экспедицияларга юборишни режалаштирмоқда. Бу ҳақда NASA раҳбари Жаред Айзекман маълум қилди, деб ёзади ТАСС.
Унинг таъкидлашича, асосий мақсад Ойнинг жанубий қутбида база ташкил этиш ва у ерда астронавтларнинг узоқ вақт давомида яшаши учун шароит яратишдан иборат. NASA чорак асрдан ортиқ вақт давомида Халқаро космик станцияда тўпланган тажрибани Ой юзасида ҳам қўллашни кўзламоқда.
Айзекманнинг эслатишича, NASA 2028 йилда «Артемида-4» миссияси доирасида астронавтларни Ойга қўндиришни режалаштирган.
Унинг сўзларига кўра, АҚШ президенти Дональд Трампнинг космик сиёсатидан кўзланган мақсад фақат Ойга бориб, у ерда байроқ қолдириш эмас, балки инсонларнинг бошқа осмон жисмида доимий ҳозир бўлишини таъминлашдир. Бунинг учун Ойда инсонлар яшай оладиган илк база ташкил этиш режалаштирилмоқда.
Ҳозирда NASA Ойга қўниш учун иккита турли модул устида иш олиб бормоқда. Улардан бирини SpaceX, иккинчисини эса Blue Origin компанияси ишлаб чиқмоқда.
