Жанубий Кореяда ноқонуний таксичилик билан шуғулланганликда гумон қилинаётган ўзбекистонлик эркак маҳаллий такси ҳайдовчисини калтаклаганликда гумонланмоқда. Бу ҳақда MoneyToday нашри хабар берди.
Маълум қилинишича, воқеа 18 октябрь куни Кёнги вилоятининг Хвасон шаҳрида содир бўлган. 50 ёшлар атрофидаги А. исмли такси ҳайдовчиси ўзбекистонлик Б. исмли эркак шахсий автомобилига йўловчиларни чиқариб, улардан пул олаётганини кўрган.
А. ноқонуний йўловчи ташишни тўхтатишни талаб қилган. У полицияга хабар бериш учун телефонини олганида, Б. унинг жағига мушт туширган. Зарба оқибатида ҳайдовчи ҳушини йўқотиб, ерга йиқилган.
Маҳаллий телеканал орқали намойиш этилган видеорегистратор ёзувларида Б. ҳушсиз ётган ҳайдовчини тепишда ва муштлашда давом этгани акс этган. Шундан сўнг у жабрланувчига биринчи ёрдам кўрсатмасдан воқеа жойидан кетган.
Ҳушига келган А. телефони йўқолганини пайқаб, автомобилидаги бошқа телефон орқали полицияга мурожаат қилган. Йўқолган телефон воқеа жойидан тахминан 40 метр узоқликдаги дўкондан топилган.
Жабрланувчининг айтишича, у ҳодиса тафсилотларини эслай олмаган ва воқеани видеорегистратор ёзувини кўрганидан кейингина билган. Унга мия чайқалиши ташхиси қўйилган. Кучли бош айланиши ва қўрқув сабабли А. таксичилик қила олмаётгани, шунингдек, оиласини таъминлашда қийналаётганини билдирган.
Ҳайдовчи ҳудуддаги ноқонуний таксичилик ҳолатлари бўйича бир неча бор мурожаат қилганини, аммо тегишли назорат чоралари кўрилмаганини таъкидлаган. Унинг сўзларига кўра, полиция далиллар етарли эмаслигини айтган, маҳаллий ҳокимият эса полиция билан ҳамкорлик зарурлигини билдирган.
Нашр маълумотларига кўра, ноқонуний йўловчи ташувчилар мижозларни Telegram ва бошқа чатлар орқали топиб, тўловни нақд пулда қабул қилади. А. бундай автомобиллар ҳайдовчилари томонидан йўл ҳаракати қоидаларини бузиш, хавфли ҳайдаш ва белгиланган меъёрдан ортиқ йўловчи ташиш ҳолатлари ҳам учраб туришини айтган.
Шунингдек, у бундай ҳолатлар ҳақида хабар бериш учун далил тўплашга уринаётганда яна калтакланишдан қўрқаётганини билдирган.
