Бугун, 31 октябрь куни Украина Президенти Владимир Зеленский Туркия Президенти Ражаб Тойиб Эрдўған билан музокаралар ўтказиш учун Истанбул шаҳрига борди.
"Жамоамиз билан Истанбулга етиб келдик. Олдинда Туркия Президенти Ражаб Тойиб Эрдўған билан муҳим музокаралар кутиб турибди", — деб ёзди Зеленский.
Украина Президентининг таъкидлашича, музокаралар давомида Украина аҳолисини ҳимоя қилишни кучайтириш, Туркия билан икки томонлама ҳамкорликни ривожлантириш ҳамда дипломатик ечимларни излаш масалалари муҳокама қилинади.
"Қора денгизда кемалар қатновига оид муҳим масалалар бор", — деди Украина раҳбари.
Шунингдек, Зеленский Константинополь патриархи Варфоломей билан ҳам учрашишни режалаштирганини маълум қилди.
Аввалроқ Туркия Президенти администрацияси ҳузуридаги Коммуникациялар бошқармаси раҳбари Бурҳониддин Дуран Владимир Зеленский Ражаб Тойиб Эрдўғаннинг таклифига биноан 31 октябрь куни Туркияга амалий ташриф билан келишини билдирган эди.
Унинг маълум қилишича, Истанбулдаги музокараларда томонлар икки давлат ўртасидаги ҳамкорликни янада ривожлантириш, минтақавий ва халқаро масалаларни, хусусан, Россия-Украина уруши ҳамда Қора денгиз минтақасидаги хавфсизлик вазиятини муҳокама қилади.
