Малайзиядан Тошкентга учиб келаётган самолётда маст ҳолда жанжал кўтариб, борт кузатувчилари ва йўловчиларни ҳақорат қилган Россия фуқароси 7 суткага маъмурий қамоққа олинди.
Darakchi.uz танишган суд ҳужжатига кўра, воқеа 2026 йил 5 ноябрь куни HY-552 рейси орқали амалга оширилган “Куала-Лумпур — Тошкент” парвози вақтида содир бўлган.
Маълум қилинишича, Россия фуқароси В.К. самолёт бортида маст ҳолда бақир-чақир қилиб, йўловчиларнинг тинчлигини бузган. У борт кузатувчисига қўпол муомалада бўлиб, уни ва бошқа йўловчиларни ҳақорат қилган. Уни тинчлантиришга бўлган уринишлар эса натижа бермаган.
Самолёт Тошкент халқаро аэропортига қўнгач, ички ишлар ходимлари йўловчидан самолётдан тушиб, ҳолат юзасидан тушунтириш бериш учун маъмурий бинога боришни сўраган. Бироқ у ходимларнинг қонуний талабларига бўйсунмаган. Ҳатто қўл юкини самолёт трапидан ерга улоқтириб, тепган.
Суд мажлисида В.К. айбига иқрор бўлган. У парвоз вақтида борт кузатувчисидан спиртли ичимлик сўрагани, бироқ мастлиги сабабли унга рад жавоби берилганини айтган. Шундан кейин улар ўртасида тортишув келиб чиққан. Россиялик қилмишидан пушаймонлигини билдирган.
6 ноябрь куни Жиноят ишлари бўйича Сергели туман суди В.К.ни Маъмурий жавобгарлик тўғрисидаги кодекснинг 183-моддаси (майда безорилик) ҳамда 194-моддаси биринчи қисми (ички ишлар органлари ходимининг қонуний талабларини бажармаслик) бўйича айбдор деб топган.
Суд қарорига кўра, унга майда безорилик учун 7 сутка маъмурий қамоқ, ички ишлар ходимининг қонуний талабларини бажармаслик учун эса 440 минг сўм жарима тайинланган. Жазоларни қўшиш натижасида узил-кесил 7 сутка маъмурий қамоқ белгиланган.
