Ҳиндистонда Амритсар–Нью-Жалпайгури йўналишида ҳаракатланаётган поезднинг тўртта вагонида ёнғин содир бўлди. Ҳодиса оқибатида қарийб 1500 нафар йўловчи эвакуация қилинди, 16 киши тиббий ёрдам сўраб мурожаат қилди. Бу ҳақда “The Times of India” хабар берди.
Маълум қилинишича, ёнғин 6 ноябрь куни тушдан кейин Панжоб штатидаги Сарай-Банжара темирйўл бекати яқинида содир бўлган. Поезд Садхугарх қишлоғидан ўтиб кетаётган вақтда вагонлардан бирида ёнғин бошланган. Қисқа вақт ичида тутун бошқа вагонларга ҳам тарқалган.
Ҳодиса жойига ёнғин-қутқарув экипажлари, полиция ходимлари ва тиббиёт гуруҳлари жалб этилган. Маҳаллий аҳоли ҳам ёнғинни ўчириш ишларига ёрдам берган. Ёнғин сабаб поезд тўхтатилиб, тўртта умумий вагон таркибдан ажратилган.
Маълумотларга кўра, 16 нафар йўловчи тиббий ёрдамга мурожаат қилган. Уларнинг саккиз нафари енгил куйиш жароҳатини олган, қолганларида эса енгил тан жароҳатлари аниқланган. Жабрланганларнинг барчаси шифокорлар назоратига олинган, уларнинг аҳволи барқарор экани билдирилган.
Дастлабки тахминларга кўра, вагонлардан биридаги вентиляторда юзага келган қисқа туташув ёнғинга сабаб бўлган бўлиши мумкин. Бироқ ҳодисанинг аниқ сабаби ҳозирча маълум эмас. Темирйўл маъмурияти воқеа юзасидан батафсил текширув ўтказилишини билдирган.
Йўловчилардан бири Маниндер Моҳаннинг айтишича, у Муззаффарпурга кетаётган вақтда вагонни қуюқ тутун қоплаган. У поезддан чиқиб кетиш учун фавқулодда чиқиш ойнасини синдириб, ташқарига сакраган. Оқибатда енгил жароҳат олган.
Хавфсизлик нуқтаи назаридан ҳодиса жойида электр таъминоти узилган ва поездлар ҳаракати вақтинча тўхтатилган. Йўловчиларга озиқ-овқат, ичимлик суви ҳамда транспорт воситалари билан ёрдам кўрсатилган.
Шунингдек, йўловчилар сафарини давом эттириши учун Сарай-Банжара бекатидан Нью-Жалпайгури йўналишига иккита махсус поезд юборилган.
