АҚШ президенти Дональд Трамп Nvidia бош директори Женсен Хуанг билан телефон орқали суҳбатлашганини маълум қилди. Суҳбатда компания раҳбарининг Хитой фойдасига жосуслик қилишда гумонланаётган аёл билан ишқий муносабати ҳақидаги хабарлар ҳам муҳокама қилинган. Трамп ушбу вазиятдан ҳайратда эканини билдириб, Хуанг аёлнинг эҳтимолий жосуслик фаолиятидан бехабар бўлганига ишонишини айтди.
Аввалроқ Женсен Хуанг рафиқасига хиёнат қилганини тан олиб, ундан ва компания ходимларидан узр сўраган эди. Nvidia мазкур ҳолат юзасидан мустақил текширув бошлаган.
Трамп журналистлар билан суҳбатда Хуангни доимо юксак ахлоқий фазилатларга эга инсон деб билганини таъкидлади. У компания раҳбари ушбу можаро сабаб муаммога дуч келмаслигига умид билдирган. Шунингдек, АҚШ президенти Федерал қидирув бюроси (ФҚБ) ҳам иш тафсилотларини ўрганаётганини маълум қилди.
Можаро марказидаги аёл — Megaspeed компанияси раҳбари Элис Хуанг. У Хитой фойдасига жосуслик қилиш ва АҚШнинг Хитойга сунъий интеллект чипларини етказиб бериш бўйича чекловларини четлаб ўтишга уринишда гумонланмоқда. Маълумотларга кўра, АҚШ махсус хизматлари камида бир йил давомида аёлни электрон кузатув остида сақлаган.
Хитой Ташқи ишлар вазирлиги эса жосуслик ҳақидаги айбловларни рад этди. Вазирлик вакили Го Сзякун бу даъволарни асоссиз деб атаб, уларни Хитойга нисбатан туҳмат сифатида баҳолади.
Шу билан бирга, 9 ноябрь куни Nvidia акциялари 4,2 фоизга арзонлашди. Компания қимматли қоғозлари Dow Jones ва Nasdaq индексларига кирувчи компаниялар орасида энг катта пасайишни қайд этди.
