Дунёдаги энг йирик сунъий интеллект чиплари ишлаб чиқарувчиларидан бири — Nvidia компанияси бош директори Женсен Хуанг лавозимини тарк этди. Унинг истеъфоси никоҳдан ташқари муносабатлари ва Хитой фойдасига жосуслик қилганликда гумонланаётган аёл билан алоқалари ҳақидаги хабарлар ортидан юз берди. Бу ҳақда BBC хабар берди.
Nvidia 12 ноябрь куни Хуанг президент, бош директор ва директорлар кенгаши аъзоси лавозимларидан дарҳол кучга кирган ҳолда кетганини маълум қилди. Компания молиявий директори Колетт Кресс вақтинча бош директор этиб тайинланди. Ҳозирда унинг доимий ўрнини босувчи номзод изланмоқда.
Жанжал АҚШ сиёсий доираларида ҳам жиддий муҳокамаларга сабаб бўлди. Конгресс аъзолари Хуангдан унинг Хитой разведкаси билан алоқадорликда гумонланаётган аёл билан муносабатлари юзасидан изоҳ талаб қилмоқда. Гап Сингапурдаги Megaspeed компанияси раҳбарларидан бири бўлган Алиса Хуанг ҳақида бормоқда. The New York Times нашри маълумотларига кўра, у Хитой разведкаси билан алоқадор бўлиши мумкин. Пекин эса бу айбловларни рад этган.
АҚШ Бош прокурори Тодд Бланш ҳам 13 ноябрь куни Адлия вазирлиги Алиса Хуангнинг Хитой разведкаси учун ишлагани юзасидан ҳозирча якуний хулосага келмаганини билдирган.
Шунингдек, АҚШ сенаторлари Элизабет Уоррен ва Крис Кунс, шунингдек, Вакиллар палатаси Ташқи ишлар қўмитасининг бир қатор демократик аъзолари Хуангни Конгресс олдида тушунтириш беришга чақирган. Агар у ихтиёрий равишда қатнашишдан бош тортса, мажбурий чақирув қоғози юборилиши мумкин.
Жанжал фонида Хуангнинг Nvidia компаниясидаги яна бир ходима билан муносабатлари ҳақида ҳам хабарлар тарқалди. ОАВ маълумотларига кўра, бу сафар гап компаниянинг узоқ йиллик раҳбарларидан бири Кимберли Пауэлл ҳақида кетмоқда. BBC суҳбатлашган манбалар компания ходимлари уларнинг яқин муносабатларини аввалдан сезганини айтган.
Хуангнинг биринчи муносабати ҳақидаги хабарлар компания ходимлари орасида катта шов-шувга сабаб бўлмаган. Бироқ иккинчи муносабат ҳақидаги маълумотлар ошкор бўлгач, ходимлар вазиятдан жиддий хавотирлана бошлаган.
Nvidia аввалроқ компания раҳбари хорижий разведка таъсирига тушган-тушмаганини аниқлаш учун мустақил текширув бошлаганини маълум қилган эди. Компания ҳозирча миллий хавфсизлик ёки тижорат сирлари билан боғлиқ маълумотлар ошкор бўлганига ишониш учун асос йўқлигини билдирган.
Женсен Хуанг 1993 йилдан буён Nvidia компаниясининг асосий юзи бўлиб келган. Сўнгги йилларда сунъий интеллект технологияларига талаб ортиши компаниянинг жадал ривожланишига туртки берди. Nvidia чиплари катта ҳажмдаги маълумотларни қайта ишлаш имконияти туфайли сунъий интеллект тизимларини ишлаб чиқувчи компаниялар учун муҳим маҳсулотга айланди.
Жанжал компания акциялари қийматига ҳам таъсир кўрсатди. BBC маълумотларига кўра, беш кун ичида Nvidia бозор қиймати 550 миллиард долларга камайган. Бу компания биржага чиққанидан буён қайд этилган энг йирик беш кунлик пасайишлардан бири бўлди.
Маълумот учун, Женсен Хуанг турмуш ўртоғи Лори Хуанг билан 40 йилдан буён никоҳда. Уларнинг икки фарзанди ҳам Nvidia компаниясида раҳбарлик лавозимларида ишлайди.
