Туркиянинг Малатья вилоятида С-70 русумли ҳарбий вертолёт қулаши оқибатида унинг бортида бўлган тўрт нафар ҳарбий хизматчи ҳалок бўлди. Бу ҳақда Туркия Миллий мудофаа вазирлиги хабар берди.
Маълум қилинишича, ҳодиса Малатья вилоятининг Яшилюрт туманидаги Саманқўй ҳудудида юз берган. Ҳозирча вертолётнинг нима сабабдан қулагани аниқланмаган. Ҳодиса жойига тез ёрдам, ёнғин-қутқарув ва тиббиёт ходимлари юборилган.
Дастлаб вертолёт қолдиқлари топилгани ва қидирув-қутқарув ишлари бошлангани хабар қилинган. Кейинроқ Туркия Мудофаа вазирлиги ҳалокат оқибатида тўрт нафар ҳарбий ҳалок бўлганини тасдиқлаган.
Вазирлик баёнотида ҳалок бўлган ҳарбийлар "қаҳрамон сафдошларимиз" деб таърифланган ва уларнинг оилаларига ҳамдардлик билдирилган.
Ҳалок бўлганлар майорлар Эрдем Чимен ва Орхун Пинар, катта сержант Ҳусейн Зеҳир ҳамда сержант Серкан Ондер экани маълум қилинди.
Туркия мудофаа вазири Яшар Гюлер ҳам ҳалок бўлган ҳарбийларнинг оила аъзолари ва яқинларига таъзия билдирган.
Ҳодиса юзасидан Малатья Республикаси Бош прокуратураси тергов бошлаган. Терговга бир нафар бош прокурор ўринбосари ва икки нафар прокурор жалб этилган.
