Тошкент шаҳрининг Бектемир туманида уйларни ижарага бериш баҳонасида фирибгарлик қилганликда гумонланаётган икки эркак қўлга олинди. Уларнинг ҳаракатларидан 10 нафардан ортиқ киши жабрланган. Бу ҳақда Ички ишлар вазирлиги Кибержиноятчиликка қарши курашиш департаменти хабар берди.
Маълум қилинишича, гумонланувчилар OLX ва Telegram платформаларида бозор нархидан анча арзон уй-жой ижараси ҳақида эълонлар жойлаштирган. Улар ўзларини хонадон эгалари ёки риелторлар сифатида таништириб, ижарага олмоқчи бўлганлардан олдиндан тўлов олишган. Пулни қўлга киритгач эса алоқани узишган.
Тезкор тадбир давомида улардан 8 та мобиль телефон, 15 та SIM-карта ва 16 та банк картаси ашёвий далил сифатида олинган.
Ҳолат юзасидан Жиноят кодексининг 168-моддаси 3-қисми (фирибгарлик) билан жиноят иши қўзғатилган. Жабрланувчиларга етказилган умумий зарар миқдори очиқланмаган.
