Тошкент метросида йўловчини ўрнини бўшатиб бермагани учун ҳақорат қилган ва кейинчалик унинг ортидан бориб, жанжални давом эттирган икки эркак маъмурий қамоққа олинди. Бу ҳақда Тошкент шаҳар Ички ишлар бош бошқармаси матбуот хизмати хабар берди.
Маълум қилинишича, воқеа Чилонзор йўналишидаги метро бекатларидан бирида содир бўлган. Фуқаро А. бошқа йўловчи унга жой бўшатиб бермаганидан норози бўлиб, уни ҳақорат қилган ва оғзаки жанжаллашган.
Шундан сўнг у йигитнинг ортидан бориб, Чилонзор туманидаги овқатланиш шохобчаси яқинида ҳам ҳақорат қилишда давом этган.
Воқеа акс этган видео ижтимоий тармоқларда тарқалган. Кейинчалик жабрланувчи видеони унинг рухсатисиз Instagram саҳифасига жойлаштиришганини билдирган.
Ҳуқуқбузарлардан бири видеони контент ва лайк йиғиш мақсадида жойлаштирганини айтган ва қилмишидан пушаймонлигини билдириб, узр сўраган.
Суд қарорига кўра, ҳар икки эркак Маъмурий жавобгарлик тўғрисидаги кодекснинг 183-моддаси (майда безорилик) билан айбдор деб топилиб, уч суткадан маъмурий қамоқ жазосига ҳукм қилинган.
