Россиянинг Санкт-Петербург шаҳрида Ўзбекистон фуқаросини ўғирлаш ва ундан товламачилик йўли билан пул талаб қилишда айбланган тўрт нафар шахсга суд ҳукми ўқилди. Улар 5,5 йилдан 6 йилгача озодликдан маҳрум этилди. Бу ҳақда 78.ru хабар берди.
Судлар қўшма матбуот хизмати маълумотига кўра, воқеа 2025 йил март ойида содир бўлган. Айбланувчилардан бири жиноятни режалаштириб, Ўзбекистондан бўлган эркакнинг Санкт-Петербургдаги уйига борган.
Шундан сўнг гуруҳ аъзолари уни мажбуран машинага ўтқазиб, 200 минг рубль талаб қилган. Пулни бермаган тақдирда унинг бурнини синдириш билан қўрқитишган.
Судда айбланувчилар ўз айбини тан олмаган. Бироқ якунда тўртала шахс ҳам 5,5 йилдан 6 йилгача юқори хавфсизлик колониясига ҳукм қилинган.
