Ҳиндистоннинг шимоли-шарқидаги Ассам штатида автобус ва юк машинаси тўқнашиши оқибатида камида 24 киши ҳалок бўлди, яна 11 нафар йўловчи жароҳатланди. Бу ҳақда BBC хабар берди.
Маълум қилинишича, ЙТҲ Казиранга миллий боғи яқинида содир бўлган. Жароҳатланганлар Жорхат тиббиёт коллежи ва шифохонасига етказилган.
Ассам штати қишлоқ хўжалигини ривожлантириш вазири Атул Боранинг айтишича, ҳалок бўлганлар орасида коллеж талабалари ҳам бор. Бироқ уларнинг шахси ҳозирча расман маълум қилинмаган.
Вазирнинг билдиришича, гувоҳлар транспорт воситаларидан бири юқори тезликда ҳаракатланган бўлиши мумкинлигини айтган. Ҳодисанинг аниқ сабаби терговдан сўнг маълум бўлади.
Ассам бош вазири Химанта Бисва Сарма ижтимоий тармоқдаги саҳифасида фожиа барчани қаттиқ ларзага солганини билдириб, жароҳатланганларга зудлик билан зарур тиббий ёрдам кўрсатиш устувор вазифа эканини таъкидлаган.
Қайд этилишича, автобус Бокахат шаҳридан Нагаон томон ҳаракатланаётган бўлган.
Маълумот учун, Ҳиндистонда йўл-транспорт ҳодисалари оқибатида ҳар йили минглаб одамлар ҳалок бўлади. 2023 йилда мамлакат йўлларида 172 минг киши вафот этган бўлса, 2025 йилда бу кўрсаткич 183 минг 382 нафарга етган.
