Хонанда ва актёрларнинг ижодига уларнинг фарзандлари қандай муносабат билдиради? Ота-онасининг машҳурлиги болаларнинг ҳаётида ёрдам берган ёки аксинча халақит берган пайтлар ҳам бўлганми? “Суғдиёна” газетаси машҳурлар ва уларнинг фарзандлари билан учрашиб, шу каби саволларга жавоб излади.
Ўзбекистон халқ артисти Юлдуз Усмонованинг қизи, хонанда Нилуфар Усмонова машҳур инсоннинг фарзанди бўлиш ҳақида қуйидаги фикрларни билдирди:
“Ота-онанинг машҳурлиги фарзандларга албатта, таъсир кўрсатади. Бу ҳислар бошимдан ўтган, биламан. Юлдузнинг қизи бўлиш осон эмас. Тўққиз ёшли қизалоқ учун онаси фақат унга эмас, бутун халққа меҳр, эътибор бериши кераклигини тушуниш, қабул қилиш қийин кечган, албатта. Бугун эса болаларимга ҳам осон эмаслигини тушуниб турибман. Лекин ҳар қандай вазиятда ҳам биринчи ўринда она эканлигимни унутмайман. Катта ўғлим ‘Кел иккимиз’, Иброҳимхон ‘Дона-дона’, Сулаймонхон эса бувисининг қўшиқларини маза қилиб тинглайди. Уларга меҳр бериш, вақтни бирга ўтказишдан завқланаман”.
“Суғдиёна” газетасининг 19 январь куни сотувга чиқадиган 3 сонида Жаҳонгир Позилжонов, Райҳон Уласенова, Рихситилла Абдуллаев, Валижон Шамшиев ва Улуғбек Раҳматуллаевларнинг фарзандлари уларнинг ижодига қандай муносабатда эканлиги билан танишишингиз мумкин.
