Аргентиналик футбол юлдузи Лионел Месси бойлиги 1 миллиард долларга етган футболчилардан бирига айланди. Бу ҳақда Bloomberg агентлиги хабар берди.
Bloomberg Billionaires Index маълумотларига таяниб хабар беришича, солиқлар, бозор шароитлари, инвестициялар ва ҳомийлик даромадларини ҳисобга олганда, Лионел Мессининг соф бойлиги 1 миллиард доллардан ошган.
Қайд этилишича, бу кўрсаткич уни спорт дунёсида илк миллиардер бўлган узоқ йиллик рақиби Криштиану Роналду билан бир қаторга қўяди.
Маълумотларга кўра, Месси 2007 йилдан буён фақат маош ва бонуслар ҳисобидан 700 миллион доллардан ортиқ даромад олган. Унинг миллиардер мақомига эришишида реклама шартномалари, медиа лойиҳалар ва инвестициялар ҳам муҳим роль ўйнаган.
Ҳозирда 38 ёшли ҳужумчи 2023 йилдан бери Американинг "Интер Майами" клубида тўп сурмоқда. Унинг йиллик умумий даромади тахминан 130 миллион доллар атрофида баҳоланади.
